Presentación da novela Terror Mortis na Biblioteca Municipal de Ortigueira
O misterio e a ciencia forense do século XIX chegan a Ortigueira da man de Xosé María Ferro Formoso
EDITORIAL
11/5/20251 min read
A Biblioteca Municipal Juan Fernández Latorre acollerá o vindeiro venres 7 de novembro de 2025, ás 19:30 horas, a presentación da novela Terror Mortis, do escritor Xosé María Ferro Formoso.
O acto, organizado pola Asociación Terras de Ortegal coa colaboración da propia biblioteca e do Concello de Ortigueira, contará coa participación de Xosé María Torres, vicepresidente da entidade, e do autor da obra.
Durante a presentación, o público poderá coñecer de primeira man o proceso creativo desta novela ambientada na Galicia rural de finais do século XIX, protagonizada polo doutor forense Alfonso Neira Lafontaine, quen se ve envolto nunha misteriosa investigación criminal nunha pequena vila galega tras a morte do secretario municipal. A obra combina o misterio e a intriga propios da novela negra cun fondo histórico e etnográfico, no que a superstición e o imaxinario galego se entrelazan co avance da ciencia forense.
As persoas asistentes poderán adquirir un exemplar da novela e levalo asinado polo autor. Unha oportunidade única para afondar nunha historia chea de suspense, ambientada no corazón da Galicia decimonónica.
Sobre o autor
Xosé María Ferro Formoso (As Pontes, 1980) é documentalista e técnico en xestión do patrimonio cultural. Compaxina o seu labor profesional no ámbito da investigación e da divulgación do patrimonio coa escrita. Terror Mortis é a súa primeira novela publicada, unha obra que abre unha serie de intrigas históricas protagonizadas polo doutor Alfonso Neira Lafontaine e ambientadas na Galicia do século XIX.